Luke 3

Jon nu pagle awo kandja dje pene wori

(Matyu 3.1-12 ne, Mak 1.2-8 ne, Jon 1.19-28)

1Kune ge una gapman moi ge embe mal moi. Kona dumo Rom yei al iwa kerman Sisa Taiberias kognumb 15-pela une king iwa kerman moi. Iwa Pontias Pailat distrik Judia kantau yeika, iwa Erot distrik Galili kantau yeika, Erot age Pilip distrik soka kantau yei, ta Ituria, ta Trakonaitis. Iwa Laisenias distrik Abilini kantau yei. 2Iwa Anas ne, Kaiapas soka ge opa gale awi iwa kerman mopill kune ge, Sekaraia wariye Jon dumo wapra yei al po moika, God kandja dje Jon awi. 3Jon po nu Jodan kapa dumo yemyem po wanmolo, una moi al kandja embe dje awi, ye nomane ake taneke, na ye nu pagle aunaka, God ye ke ye waninj ge kere aunda we dji. 4Jon kandja embe dje awi ge, propet Aisaia asa pepa boi mal megye toi. Une pepa boi ge embe dji, dumo wapra yei al iwa ta yau to embe djindo, Iwa Kerman kondwe wonda al ge, ye po amblokun ye wopake yeme! dji. 5Nu tupa yedo al ye po makimb wallke wor pla woro, makimb komge nou dje er pla wo paro al, ye po wallke kal worneke, makimb alla tune yendaka embe yeme! Kondwe geko bake yenda ge, ye po amblo du dje, kondwe ku ta mugo yage ye moya ge, ye po wallke woro ye wopake yeneke, 6God dje wordaka, iwa ta wo nono i yem worda we dji ge wondaka, una kurwo kama porapora kanne we dje Aisaia pepa embe boi.

7Una merke Jon no nu pagle aunda dje pille womaka, Jon kane embe dji, ye nomaga ke moro mal embe wonj. God are tano we dji ge una ne mal wo dji, ye seke er na moll al wonj ne? 8Ye nomane ake kaima toi dal, ye singare wopake ye, nomane ake toi mal embe kaima yene. Nono Abraam wombaye mormon pille God nono wandill golo aunda dje ye napiye! God ku kiwa ta i bekda ge, wo er Abraam wombaye moye, kune yendo. Ye Abraam wombaye mor mal ge God pille pla nayendo. 9God djapin ta i iko me al i wori yero. Wori al ge iko megye wopake ta natoi dal, una simb to kal woro wamo gaye we dji.

10Jon kandja embe djika, una no namba mal yembon ne? dji. Djimaka, Jon embe dji, 11iwa ta konye pakna soka yei dal, ta i une kon pakna nayenda una moya al aunda. Una kwa mokna ta nayei dal, ta yenda una para embe ye aunda we dji. 12Ku takis i una Jon nu pagle aunda dje pille wo embe dji, tisa, no namba mal yembon ne? dji. 13Djimaka Jon embe dji, ye ku takis ine ge gapman djindo mal ine, merke naine! we dji. 14Kandja embe djika, ami una pende Jon moi al wo embe dji, no namba mal yembon ne? dji. Jon embe dji, ye kot kende kulo dje una nawo, ku moni ngunjo nambon dje nayene. Gapman ye top aundo mal, ye kune imbon dje piye, kandja nadjine we dji. 15Jon kandja embe djika, una moi ge nomane to pille embe dji, God Iwa Krais dje worno wo nanam unakna i yem worda we dji ge, Jon ge wale moro mo? dji.

16Kandja embe djimaka Jon kandja embe dje awi, na ye nu kiwa pagle aundo ba, are iwa ta wo na kamblo aunda. Iwa wonda ge na po une kake su kaye piska tano ge kune nayenda. Une wonda ge God Murble wamo boll aike iwo ye pagle aunda. 17Aunda una ge ye molo bulo amblo i wit moro ge sek tonda. Megye yage kal to moya ge i mogya ba, tandwane moya ge une i wamo gayaka, do pa moya, pora nadjinda we dji. 18Jon kandja wopake merke embe dji ge una pille nomane ake tane dje pille dji.

King Erot wo Jon kaye to pagi

(Matyu 14.3-4 ne, Mak 6.17-18)

19King Erot yene age Pilip gamegama ngudjo i, alla singare ke pende merke yei al ge, Jon man dje, ni singare embe yenden ge kune nayendo we dji. 20Djika Erot singare ke alla ta yei ge une Jon i po kaye numb wori.

Jon Jisas nu pagle awi

(Matyu 3.13-17 ne, Mak 1.9-11)

21Jon una merke nu pagle awo moi al ge, Jisas woika une Jisas aike nu pagle awi. Awo kerika Jisas kamang ye moika, kupill al au djika, 22God Murble ka pulma mal embe pir dje kal Jisas moi al woi. Woika una ta kupill al molo yau to embe dji, ni na warna kaima moren. Na ni kane wopake kaima yendo, na mindalna arngan yendo we dji.

Jisas Gollye asa moi mal kandjine

23Jisas kogo kindja yeno dje yei ge une kognumb 3-pela ten (30) mal embe moi. Una molo embe dje kani, Jisas ne moi ge Josep. Josep moi ge ne Ilai. 24Ilai ne ge Matat. Matat ne ge Lipai. Lipai ne ge Melki. Melki ne ge Janai. Janai ne ge Josep. 25Josep ne ge Matatayas. Matatayas ne ge Emos. Emos ne ge Nayum. Nayum ne ge Eslai. Eslai ne ge Nakai. 26Nakai ne ge Mat. Mat ne ge Matatayas. Matatayas ne ge Semen. Semen ne ge Josek. Josek ne ge Joda. 27Joda ne ge Joanan. Joanan ne ge Resa. Resa ne ge Serubabel. Serubabel ne ge Siyaltiyel. Siyaltiyel ne ge Neri. 28Neri ne ge Melki. Melki ne ge Adi. Adi ne ge Kosam. Kosam ne ge Elmandam. Elmandam ne ge Er. 29Er ne ge Josuwa. Josuwa ne ge Eliyesa. Eliyesa ne ge Jorim. Jorim ne ge Matat. Matat ne ge Lepai. 30Lepai ne ge Simion. Simion ne ge Juda. Juda ne ge Josep. Josep ne ge Jonam. Jonam ne ge Eliyakim. 31Eliyakim ne ge Meleya. Meleya ne ge Mena. Mena ne ge Matata. Matata ne ge Natan. Natan ne ge Depit. 32Depit ne ge Jesi. Jesi ne ge Obed. Obed ne ge Bowas. Bowas ne ge Sala. Sala ne ge Nason. 33Nason ne ge Aminadap. Aminadap ne ge Admin. Admin ne ge Arni. Arni ne ge Esron. Esron ne ge Pares. Pares ne ge Juda. 34Juda ne ge Jekop. Jekop ne ge Aisak. Aisak ne ge Abraam. Abraam ne ge Tera. Tera ne ge Naor. 35Naor ne ge Seruk. Seruk ne ge Reu. Reu ne ge Pelek. Pelek ne ge Eper. Eper ne ge Sala. 36Sala ne ge Kainan. Kainan ne ge Arpasat. Arpasat ne ge Siyem. Siyem ne ge Noa. Noa ne ge Lamek. 37Lamek ne ge Metusela. Metusela ne ge Enok. Enok ne ge Jaret. Jaret ne ge Mayalalel. Mayalalel ne ge Kenan. 38Kenan ne ge Enos. Enos ne ge Set. Set ne ge Adam. Adam ne ge God.